#OpiniUgan
Penulis: DR Hendra Alfani Dosen Fisip Unbara
Kang Khemad dang sibuk nian mak ini akhi. Kate-katenye kalu ngumong ngekhi nian. Pribase ape peranggohannye dek temakan dalam pikeran idangan Zuni, Mawi nggok Repan.
Maklumlah kamu bilang ukhang ye. Gawian kawan khang tige ni semenjane. Zuni sakhi-sakhinye upahan nebas, Mawi ni najokh nggok masang bubu di Ulu Tulung. Sementare Repan kepacak’annye cuman mekhepas puyoh.
Kawan khang tige ni cuman pacak ngangapkan mulut amon lah nganeng surahan Kang Khemad. Kapan ditanye nak kemane, jawaban Kang Khemad ni ngekhi. Koordinasi, konsolidasilah, rapat ring sijat, ape masang intelijen di pihak besan. Cacam …!
“Sape Kang ye nak mayukan anak tu. Dek kan ade idangan untok pihak besan tu indomie telokh.” Tanyean Zuni lok ayam jagok mabok kepayang di bucu pance.
“Ai, bahaye itu Kang amon lah nak masang ring sijat. Itu amon uji Unggang kelini jeme mengek sesak nafas ape ulu ati jantungnye ngupit. Laju nak dipumpe masang ring sijat tadi ape Kang?” tanyean Repan lah budu bagak pule sambil nggakhu panau di kebualnye.
“Nah au Kang, setau ku amon koor tu jeme ye nyanyi rembak mi-rami amon ade acara 17-an. Kalu konsol tu, gawian jeme demam nak betemu menteri kesehatan, ape nak betemu ahli jiwe karne dang rusak ati,” surah Mawi lah nyimbat pule lok burung kecici bengkelanan sawe.
“Inilah saya nggak level, kalu beradu kate dan isi pikiran dengan kamu khang tiga ini. Jauh saja kamu khang tiga ni merantau cuman dak dapat ilmu. Pulang-pulang ke dusun cuman upahan nebas, najur sama masang bubu dan merepas puyoh.” Timbal ,,, ehh jawab Kang Khemad jumawe nian.
Zuni, Mawi nggok Repan cuman pacak terganga mulutnya, nganeng timbalan Kang Khemad. Berat Boss … nggak level ujinya. Kawan khang tige ni cuman pacak saling cerilepkan kian. Kelakuan Kang Khemad mimang pecak bulan pelitek dang munggar naek.
Mamak Mirul, ye dang mantau surahan kawan di bucu pance tu, cuman laju nggakhu palak ye dek gatal. Damenye nian makanan Khemad ni mak ini akhi, pekirati Mamak Mirul.
“Jadilah! Sudelah Zun, Wi, Pan ngan khang tige tu ngajak’i Khemad tu waltawalan. Pecaknye Khemad ni lah makan pur pelitek ayam petelokh tu ase ku. Dek kan tekecak agi ndai kamu khang tige tu umonganye,” uji Mak Mirul ngingatkan Zuni, Mawi nggok Repan.
“Nah inilah kamu ni Mamak, dek kene nginak aku maju diket. Empai nak mentas lah kamu cempe aku ni. Payah nian amon lok kamu ye lah dek milui agi urusan pelitek ni. Udah nggak eksis sih, jadi susah aku mendeskripsikan situasi pelitek sekarang ini,” timbal Kang Khemad sambil ninggikan tagugnye.
“Cacam Kang, alangkah pakamnye timbalan ngan. Kalu kualat ngan kele. Awak ilmu empai setinggi batang pisang. Cuman sayang ngan dek tau sape nian mak ini akhi idangan Zuni, Mawi nggok Repan ni,” sentil Ibung Sedah sambil mekhah sabunan di bawah tundan.
“Memangnya siapa budak khang tiga ini?” Kan Zuni cuman ahli nebas, Mawi cuman spesialis najokh apa masang bubu, dan Repan si palak tagug ini ahlinya tukang repas puyoh! Dek lebeh ndai itu kan?” tanye Kang Khemad sinis-jumawe nian.
“Nah-nah … lum tau rupenye Khemad si pulitisi tanggun ini, Dah! Ye akhi-akhinye mak ini sibuk koordinasi, konsolidasi pelitek, ape sibuk rapat ring sijat. Nah, cukah ngan terangkan, Dah!” Perintah Mamak Mirul.
“Siap Mamak. Anengkan ndai ngan ye Kang! Zuni ni Sarjana Pelitek, lulusan Universitas Bulan Purname (UBP). Mawi ini Sarjana Hukum, lulusan Universitas Tandok Khuse (UTK), sementare Repan ni Sarjana Kejiwean lulusan Universitas Tegak Prinsip (UTP).” Terang Ibung Sedah lok jubir pelitek pileh tanding.
“Jadi makmane Mad? Gi tangeh gale nian ilmu ngan, ye cuman sekolah bawah batang keladi tu. Jadi khalah nak belebehan ige, biase-biase kian. Slow aja Boss!” Sentil Mak Mirul agak jemengek.
Keting Kang Khemad nir-tir, lok jeme gelegasan campur legatean. Nah macet ngan Kang. Balak pule gawian, laju tebungkar resie Zuni si ahli nebas, Mawi spesialis najokh dan masang bubu. Serte si Repan tukang mekhepas puyoh.
Hahaha … lebaar. Intinye santai kian, pelitek ni slow-slow aja Boss…! Khalah belebehan ige (kudai). Kele te tutok padi ampe. Galenye kan ade masenye. Tabek. (*)
